Паходжанне назваў вуліц вескі Грэск
Вуліца спартыўная
Жыў на хутары Калінка пан Бакрэўскі. І вельмі любіў ён усякія спартыўныя спаборніцтвы і кулачныя баі. Часта арганізоўваў ён спаборніцтвы на той тэрыторыі ў Грэску, дзе зараз знаходзіцца вуліца Войчыка. А раней гэту вуліцу называлі Спартыўнай.
Кажуць, што тут некалі быў сапраўдны стадыён.
Макаранка Ф. І.
1930 г. н.
в. Грэск
Адкуль назва вуліцы Крывой
Садовую вуліцу называлі некалі Крывой.
Даўно, кажуць, жыў тут цырульнік, які накульгваў на адну нагу. Шмат людзей хадзіла да яго, каб падстрыгчыся і пагаліцца.Сяляне казалі: “Пайшлі да “крывога”!” і адразу было зразумела, куды ісці і чаго. Пазней і вуліца тая стала называцца Крывой.
Душэўская Ю. А.
1926 г. н.
в. Грэск
Папоў канец
Канец вуліцы Камсамольскай называецца Паповым Канцом. Раней у некалькіх дамах на той вуліцы жылі папы. Гэта яшчэ, калі ў Грэску была царква. Вось так з`явіўся і ёсць па сённяшні дзень Папоў канец
Давідоўскі М. Ф.
1925 г. н.
в. Грэск